آيت ملول: حرب على البسطاء وسلام على المحتلين الكبار!
آيت ملول ولات بحال فيلم درامي، ولكن بلا سيناريو! القانون كيتطبّق بطريقة عجيبة: قاصح على الدراوش، وخفيف بحال الريشة على اللي عندهم "كتاف سخانين".
الباعة الجائلين؟ هادو مساكين، باغيين غير طرف ديال الخبز، ولكن السلطات كتشوفهم بحال قطاع الطرق، كتخرج عليهم بحملات بوليسية كأنهم "بابلو إسكوبار"، فغمضة عين كيتحيدو وكيمشيو بحال البرق! ولكن ملي نوصلو للمحلات الكبار والشركات، الله الله! الملك العام ولى ملك خاص، الأرصفة توسعات عليهم، والممرات تبدّلات لباركينغ ديالهم، والناس بقاو كيدورو بحال المتاهة باش يقدرو غير يدوزو.
شارع محمد الخامس؟ ها العجب العجاب! نصو مرهون للشركات، والنص الآخر مسدود فوجه الدراوش. السلطات كتجري مور مول النعناع حيث حاط طابلة صغيرة، ولكن مول الشركة اللي سد الرصيف بتراكتورات؟ هاداك "شيء عادي"، و"عندو الرخصة"، و"راك عارف كيفاش كيدور اللعب"!
فين هو العدل؟
واش اللي باغي ياكل طرف ديال الخبز خاص يكون عندو معارف وكتاف؟
علاش القانون كيطبق على الصغار وكيستتني الكبار؟
الناس كيهضرو، الغضب كيزيد، والمطالب كتكبر. بغينا قانون بحال الناس، كيتطبّق على الجميع، بلا تمييز وبلا "باك صاحبي". ولا بقات الحالة هكا، غادي نبقاو عايشين فمدينة فيها القانون كيلبس حسب المقاس، واللي ما عندوش كتاف؟ الله يعاونو ويصبّر والديه! ????
ما هو رد فعلك؟
